D’Beiz

Gnüssä cha mär ällei, s’zweitä oder innärä grossä Gruppä. S’Gnussmittel isch allerdings sältä äs Produkt vomnä einzälnä sondern entstaht ussäm Zämmäspiel vo villnä kreative Chöpf und gschicktä Händ.

I dä Huusbeiz versuechämär all dänä unzählige diräktä und indiräktä Understüzer und Produzänte äs Gsicht z’gäh wo eusi Beiz erscht ermöglichät. Wellä Metzger verarbeitet s’Fleisch, wär pflanzt eusi Chrütli und Sprosse, wär veredelt dä Fisch, was isch s’Gheimniss vom Braumeister, woher chunt oises Mobiliar,…?

All diä genialä Grundprodukt zumnä stimmigs- und gnussvollä Erläbnis uf eim Täller z’vereinä obliit dä Verantwortig vo eusäm Chuchichef «Joe» und sim Team. Sis Fachwüsse gaht wiit über «s’Rindsfilet i dä Pfannä wände» us, drum findet oft au unbekannti oder vergässä glaubti Produkt ihrän Wäg uf dä Täller. Unnötigä «Schnickschnack» weiss er z’vermiidä, dä Fokus leit er uf d’Kombination vo verschiedänä Gschmäcker und Konsistänze.

Unkompliziert, aber professionell. D’Herzbluät-GastgeberInnä vo dä Huusbeiz verwöhnäd Sie mit vill Charme und Wüsse. Hervorragendi Wii us dä Schwiiz und Europa oder s’passende Appäzöller-Bier werded gern zum bstelltä Gricht empfohlä. S’Sortimänt a Getränk und Spirituosä i dä chlinä Bar weiss mit villnä bekanntä und unbekannt lokale Erzügnis z’begeisterä.

Doch s’wichtigstä anärä Beiz sind immer no d’Gescht. Villicht isch ja eusi chlini Beiz bald scho Ihri Stamm- äh Huusbeiz?!